Повесть временных лътъ черноризца Феодосьева монастыря Печерьскаго, откуда ес(ть) пошла Русская земля, и кто в ней почал первое кн(я)жити.
Се начнем повъсть сию.
По потопъ 3-е с(ы)н(о)ве Ноеви разделиша землю — Сим, Хам, Афеть.
И яся въсток Симови: Персида, Ватрь, доже и до Индикиа в долготу и в ширину и до Нирокуриа, якож(е) рещи от въстока даже и до полуд(е)ньа, и Суриа, и Мидия, и Ефрат река, и Вавилон, и Кордуна, Асуриане, Месопотамиа, Аравия Старейшаа, Елумаисъ, Инди, Равия Силнаа, Кулии, Колгини, Фикиа вся.
Хамови же яся полуд(е)ньнаа часть: Египеть, Ефиопиа, прилежащиа ко Индомъ, другаа же Иефиопиа, из неаже исходит ръка ефиопьскаа Чермна, текущия на встокъ, Фивулии, прилежащи даже ко Куринии, Мармариа, Суриту, Ливуи, Нумидиа, Масуриа, Мавританьа, противу сущи Гадиръ. Сущим же въ встоком имать Киликию, Памфилию, Писидию,